HABANA

Regata da Pamplina a vela, Combarro. Agosto 2011

Esta dorna polbeira, encargada por un veciño de Ogrobe, foi construída por Domingo Ayaso, carpinteiro de Aguiño que tamén fixo a Jatiña, sendo este primeiro propietario o que a nomeou Habana, alá pola primavera do 2006, cando foi botada ao mar.

Foi en outubro do 2009 cando esta dorna, practicamente nova, moi lustrosa e cun nome tan atraente, namorou os ollos do seu actual propietario, Anxo Telmo, membro desta asociación. E semanas despois do flechazo a dorna púxose á venda, e así foi como esta dorna con folio de Ogrobe chegou ao porto de Portonovo.

Dende entón foron moitas as travesías e viaxes que ten feito. Moitas as regatas, encontros e xuntanzas, e moitos tamén os trofeos conseguidos na Regata da Pamplina, a remos, de Combarro, onde sempre apaña algo –é o barco a bater–. Pero algunha quilla arriba tamén houbo.