Cando a comezos deste ano souben que me tocaba continuar como presidente os próximos dous (2013-2014) tiven clara unha cousa: o cambio de ritmo. Non quero dicir que o feito ata agora teña sido pouco ou malo, todo o contrario, pero despois dalgún tempo na directiva precisaba aumentar a miña motivación para disfrutar realmente do cargo, que ao fin é o que fai que avancemos, así que me propuxen traballar por algo máis que manternos, é dicir, avanzar. Así, as novas direccións de traballo son tres: por un lado aumentar o número pero sobretodo a implicación dos socios, e non so para colaborar nos traballos, senón incluso para disfrutar das embarcacións. A idea nese sentido é promover os seus coñecementos para que gañen en autonomía de cara a navegar pola súa conta. A primeira iniciativa nesta dirección foi o curso de iniciación á navegación que Anxo impartiu o verán pasado aos rapaces. E teño a esperanza de que este ano repitan, e se pode ser aumente o número de participantes.

A segunda liña de traballo, como consecuencia do éxito da primeira, vai encamiñada a aumentar o número de embarcacións da asociación. Nese sentido, continuamos a xestionar a reconstrucción da Boca Juniors. Sei que xa debería estar rematada, pero as cousas non sempre saen como un pretende. Entón, o plan é agardar a que pase o verán e despois comezar a traballar nela (no caso da Directiva para conseguir o diñeiro necesario) con idea de tela definitivamente lista para a primaveira que ven. En todo caso, dos vós, os socios, depende o futuro da dorna de tope, ou ata que aspiremos a algo máis.

Finalmente, a terceira e non menos importante liña de traballo consiste en tentar conseguir un pantalán para embarcacións tradicionais en Portonovo. Esta, xunto co local, pode ser a clave para o crecemento da asociación nos próximos anos. Así, acabamos de presentar ao Presidente de Portos de Galicia unha solicitude ben documentada e avalada polo Concello de Sanxenxo e a Confraría de Pescadores de Portonovo. Como vedes, as aspiracións son elevadas, tanto que algúns pensaredes que peco de demasiado optimista, pero en iso consiste a miña labor como presidente. Seguiremos informando.

Adxuntamos planos coa ubicación, consensuada coa Confraría, proposta a Portos de Galicia.