Hoxe foi un día de transición, un deses días que marcan o inicio dunha nova etapa. Neste caso o paso da fase de planificación ou teórica á de execución ou práctica. Resumindo, que hoxe tocou comezar a darlle duro (progresivamente)!

Como non convén facer as cousas polas bravas, o primeiro paso foi un traballo fino: sanear á cubierta arredor da fogonadura do pau, que tiña un remendo espantoso por causa dunha rotura antiga.

Pero unha vez feito o traballo fino tocou asumir a realidade, que non é outra que os 8 metros de eslora por costado que nos quedaban por rascar e lixar. Case nada!

Aos poucos a tarefa vai indo. Hoxe tocoulles a Xoel, Ñan e Jandro, pero agardamos que nos próximos días desfilen pola dorna moitos o moi bos rascadores.